काठमाडौँ : सहआयोजक क्यानडा फिफा विश्वकप फुटबलबाट बाहिरिने पहिलो आयोजक टोली बनेको छ। अन्तिम १६ को खेलमा मोरक्कोसँग ३–० गोलअन्तरले पराजित भएपछि क्यानडाको ऐतिहासिक यात्रा टुंगिएको हो।
खेलको सुरुआत भने क्यानडाको पक्षमा रहेको थियो। टेक्सासमा भएको खेलमा क्यानडाले सुरुदेखि नै आक्रामक दबाब सिर्जना गरेको थियो। जोनाथन डेभिड र टानी ओलुवासेयीले पहिलो ११ मिनेटमै उत्कृष्ट अवसर पाए पनि मोरक्कोका गोलरक्षक बोनोले दुवै प्रहार बचाएका थिए।
पहिलो हाफमा अपेक्षाअनुसार प्रदर्शन गर्न नसकेको मोरक्कोले दोस्रो हाफ सुरु भएको पाँच मिनेटमै अग्रता लियो। अचराफ हाकिमीको फ्रिकिकबाट आएको कटब्याक पासलाई अजेदिन उनाहीले पेनाल्टी क्षेत्रको किनारबाट उत्कृष्ट प्रहार गर्दै गोलमा परिणत गरे। क्यानडाका रक्षकले उनलाई रोक्न नसक्दा मोरक्कोले खेलमा नियन्त्रण जमायो।
खेल सकिन आठ मिनेट बाँकी रहँदा उनाहीले व्यक्तिगत अवसरलाई सदुपयोग गर्दै दोस्रो गोल गरे र मोरक्कोको जित लगभग सुनिश्चित बनाए। इन्जुरी समयमा सौफियान रहिमीले गोलरक्षक म्याक्सिम क्रेपोको मुनिबाट बल छिराउँदै तेस्रो गोल गरेपछि मोरक्कोले सहज जित दर्ता गर्यो।
क्यानडाका मुख्य प्रशिक्षक जेसी मार्सले आफ्ना खेलाडीको सुरुआती प्रदर्शनको प्रशंसा गर्दै टोली नै खेलमा हावी भएको बताए। उनले विश्व वरीयताको सातौं स्थानमा रहेको मोरक्कोविरुद्ध आफ्नो टोलीले उत्कृष्ट प्रदर्शन गरेको प्रतिक्रिया दिए।
खेलभर दुवै टोलीबीच चर्को प्रतिस्पर्धा देखिएको थियो। अंग्रेज रेफ्री माइकल ओलिभरले खेलमा कुल आठ पहेंलो कार्ड देखाए। पहिलो हाफमा संघर्ष गरिरहेको मोरक्कोले दोस्रो हाफमा उत्कृष्ट पुनरागमन गर्दै नतिजा आफ्नो पक्षमा पार्न सफल भयो।
यस जितसँगै मोरक्को लगातार दोस्रो विश्वकपमा क्वार्टरफाइनलमा पुगेको छ। अब मोरक्कोले क्वार्टरफाइनलमा फ्रान्सको सामना गर्नेछ।
पराजयसँगै क्यानडाको पुरुष विश्वकप इतिहासकै सबैभन्दा सफल अभियान समाप्त भएको छ। यस संस्करणमा क्यानडाले पहिलो पटक विश्वकपमा अंक, जित, समूह चरण पार गर्ने उपलब्धि तथा नकआउट चरणमा स्थान बनाउँदै नयाँ इतिहास रचेको थियो।
