काठमाडौँ : नेपाली हिन्दू धर्मावलम्बीहरूको महान् पर्व बडादसैँअन्तर्गत आज फूलपाती मनाइँदैछ। फूलपाती नेपाली हिन्दू संस्कृतिको महत्त्वपूर्ण परम्परा हो। यस दिन घरघरमा नवदुर्गाको पूजा–आराधना गर्दै विधिपूर्वक फूलपाती भित्र्याउने चलन रहेको छ।
फूलपातीलाई देवी दुर्गाको शक्ति, समृद्धि र मङ्गलको प्रतीकका रूपमा लिइन्छ। धार्मिक मान्यताअनुसार फूलपातीका रूपमा नौ प्रकारका वनस्पति तथा पत्रिकालाई पूजा गर्ने परम्परा छ। जसमा केरा, बेसार, हलेदो, जयन्ती, बेल, अनार, अशोक, माने, कर्कलो र धानलगायतका वनस्पति समावेश छन्।
नेपाल पञ्चाङ्ग निर्णायक विकास समितिका अनुसार आज बिहान ७ बजेर ३७ मिनेटको शुभ साइतमा फूलपाती भित्र्याउन सकिने जनाइएको छ।
परम्पराअनुसार गोरखाबाट ल्याइएको फूलपातीलाई विधिपूर्वक काठमाडौँ ल्याएर हनुमानढोकास्थित दसैँघरमा भित्र्याउने गरिन्छ। यस अवसरमा नेपाली सेना, सांस्कृतिक समूह तथा सर्वसाधारणको सहभागितामा विशेष समारोह आयोजना हुने गरेको छ।
फूलपाती केवल पूजा सामग्री भित्र्याउने परम्परा मात्र नभई शक्ति, प्रकृति, समृद्धि, पारिवारिक एकता र नेपाली मौलिक संस्कृतिको संरक्षणसँग जोडिएको महत्त्वपूर्ण पर्वका रूपमा स्थापित छ। यस दिनदेखि बडादसैँको रौनक अझ बढ्ने गर्दछ।
