काठमाडौं: फेरान टोरेसले अतिरिक्त समयको १०६औँ मिनेटमा गरेको निर्णायक गोलको मद्दतमा स्पेनले साविक विजेता अर्जेन्टिनालाई १–० ले पराजित गर्दै फिफा विश्वकप २०२६ को उपाधि जितेको छ।
न्यु जर्सीस्थित मेटलाइफ स्टेडियममा सम्पन्न रोमाञ्चक फाइनलमा निर्धारित समय गोलरहित बराबरीमा सकिएपछि खेल अतिरिक्त समयमा पुगेको थियो। अतिरिक्त समयको दोस्रो हाफ सुरु भएको ३७ सेकेन्डमै पेड्रो पोरोको उत्कृष्ट क्रसमा निको विलियम्सले हेडमार्फत बल फेरान टोरेसतर्फ मिलाइदिए। त्यसलाई टोरेसले शक्तिशाली हाफ–भलीमार्फत जाली चुमाउँदै स्पेनलाई ऐतिहासिक जित दिलाए। प्रतियोगिताभर उनको यो पहिलो गोल भए पनि त्यही गोल विश्वकप जिताउन निर्णायक बन्यो।
पूरै खेलभर स्पेनले बल नियन्त्रण र आक्रमणमा वर्चस्व कायम राख्यो। स्पेनले २० वटा प्रहार गर्दा अर्जेन्टिनाले निर्धारित समयसम्म एउटै पनि प्रभावकारी प्रहार गर्न सकेन। इन्जुरी समयअघि एन्जो फर्नान्डेजले पाउ कुबार्सीमाथि गरेको कडा ट्याकलका कारण दोस्रो पहेँलो कार्ड पाएपछि अर्जेन्टिना १० खेलाडीमा सीमित भएको थियो।
यस जितसँगै स्पेनले दोस्रो पटक विश्वकप उपाधि जित्दै नयाँ इतिहास रचेको छ। सन् २०१० मा आन्द्रेस इनिएस्टाको अतिरिक्त समयको गोलबाट पहिलो पटक विश्वकप जितेको स्पेनले १६ वर्ष र आठ दिनपछि फेरि अतिरिक्त समयकै निर्णायक गोलमार्फत विश्वविजेता बन्न सफल भयो।
स्पेनले यस प्रतियोगितामा केवल एक गोल मात्र व्यहोर्दै उपाधि जित्ने पहिलो टोली बन्ने कीर्तिमान पनि बनाएको छ। साथै, युरोपियन च्याम्पियनसिप र त्यसपछिको विश्वकप लगातार जित्ने इतिहास दोहोर्याउने पहिलो टोलीका रूपमा पनि आफ्नो नाम दर्ज गराएको छ।
अर्कोतर्फ, ३९ वर्षीय लियोनल मेसीको लगातार दोस्रो विश्वकप जित्ने सपना अधुरै रह्यो। प्रतियोगिताभर आठ गोल र चार असिस्ट गरेका मेसी फाइनलमा स्पेनको सशक्त रक्षापङ्क्तिबीच प्रभाव जमाउन असफल भए। गोलकिपर एमिलियानो मार्टिनेजले ११ उत्कृष्ट बचाउ गरे पनि अर्जेन्टिनालाई हारबाट जोगाउन सकेनन्।
स्पेनका मुख्य प्रशिक्षक लुइस डे ला फुएन्टे ६५ वर्षको उमेरमा विश्वकप जिताउने सबैभन्दा पाका प्रशिक्षक बने। खेल समाप्तिपछि केहीबेर दुवै टोलीका खेलाडीबीच सामान्य धकेलाधकेल भए पनि स्थिति चाँडै नियन्त्रणमा आएको थियो। त्यसपछि स्पेनका खेलाडीहरूले उपविजेता पदक ग्रहण गर्न मञ्चतर्फ गइरहेका अर्जेन्टिनी खेलाडीलाई सम्मानस्वरूप ‘गार्ड अफ अनर’ दिएर उत्कृष्ट खेलभावना प्रदर्शन गरेका थिए।
