धादिङ : धादिङको थाक्रे गाउँपालिकामा राष्ट्रिय परिचयपत्रको विवरण दर्ता शिविर सञ्चालन भैरहेको रहेको छ। असार ६ गतेदेखि सुरु भएको शिविरमार्फत बिहिबार सम्म ३ सय १४ जनाले सेवा लिइसकेका छन्।
गाउँपालिकाका अनुसार पालिकाभित्र राष्ट्रिय परिचयपत्र बनाउने नागरिकहरूको संख्या अझै धेरै रहेकाले धादिङबेसीसम्म धाउन नपरोस् भन्ने उद्देश्यले गाउँपालिकाकै कार्यालयमा शिविर सञ्चालन गरिएको हो।
यसैबीच, गाउँपालिकाले एक सूचना जारी गर्दै उक्त शिविर यही असार २० गतेसम्म मात्र सञ्चालन हुने जानकारी गराएको छ। साथै, हालसम्म विवरण नदिएका वा छुट भएका नागरिकहरूलाई उक्त म्यादभित्र गाउँपालिकाको कार्यालयमा उपस्थित भई सेवा लिन पालिकाले अनुरोध गरेको छ।
