धादिङको थाक्रे गाउँपालिकामा वित्तीय संघीयता, प्राकृतिक स्रोतको बाँडफाँट तथा स्थानीय योजना सम्बन्धी अन्तरक्रिया कार्यक्रम सम्पन्न भएको छ।
मंगलबार गाउँपालिकाको सभाहलमा आयोजित उक्त कार्यक्रमको सहजीकरण राष्ट्रिय प्राकृतिक स्रोत तथा वित्त आयोगका कार्यवाहक अध्यक्ष जुद्ध बहादुर गुरुङले गर्नुभएको थियो। कार्यक्रममा थाक्रे गाउँपालिकाका अध्यक्ष रामकुमार आचार्यको अध्यक्षता रहेको थियो भने उपाध्यक्ष यन्त्र बहादुर थापा र प्रमुख प्रशासकीय अधिकृत बलराम लम्सालको विशेष उपस्थिति रहेको थियो।
अन्तरक्रियामा आयोगका कार्यवाहक अध्यक्ष गुरुङले वित्तीय संघीयताको प्रभावकारी कार्यान्वयन, प्राकृतिक स्रोतको न्यायोचित बाँडफाँट र स्थानीय तहको योजना निर्माण प्रक्रियालाई सुदृढ बनाउने विषयमा प्रकाश पार्नुभयो। उहाँले स्थानीय तहलाई स्रोत–साधनको उचित व्यवस्थापन गर्दै विकासलाई दिगो र प्रभावकारी बनाउन सुझाव दिनुभयो। कार्यक्रममा गाउँपालिकाभित्रका वडा अध्यक्षहरू, कार्यपालिका सदस्य, वडा सदस्य तथा कर्मचारीहरूको उल्लेखनीय सहभागिता रहेको थियो।
