ICDC नेपालको वार्षिक समीक्षा तथा सामाजिक परीक्षण कार्यक्रम सम्पन्न

धादिङ:    एकीकृत सामुदायिक विकास अभियान नेपाल (ICDC), धादिङले आफ्नो वार्षिक समीक्षा तथा सामाजिक परीक्षण कार्यक्रम सम्पन्न गरेको छ। थाक्रे गाउँपालिका–२ स्थित क्लिफ साइड रिसोर्टमा शुक्रबार सम्पन्न उक्त कार्यक्रममा संस्था, स्थानीय सरकार, सामुदायिक प्रतिनिधि तथा सरोकारवालाहरूको उल्लेखनीय सहभागिता रहेको थियो।

कार्यक्रम ICDC का प्रमुख गोपाल प्रसाद लम्सालको अध्यक्षतामा सम्पन्न भएको हो। कार्यक्रमका प्रमुख अतिथि गल्छी गाउँपालिकाका अध्यक्ष केदारनाथ खतिवडा रहनु भएको थियो भने विशेष अतिथिका रूपमा गल्छी गाउँपालिकाका उपाध्यक्ष भाइकाजी तिवारी र थाक्रे गाउँपालिकाका प्रमुख प्रशासकीय अधिकृत बलराम लम्साल रहनु भएको थियो।
उक्त कार्यक्रममा दुबै गाउँपालिकाका विभिन्न वडाका अध्यक्ष, वडा सदस्य, विद्यालयका प्रमुख, कृषक समूह, बाल क्लबका प्रतिनिधिहरू लगायत समुदायका विभिन्न क्षेत्रका प्रतिनिधिहरूको उल्लेखनीय सहभागिता रहेको थियो।

कार्यक्रममा ICDC ले सम्पन्न गरेका मुख्य कार्यक्रम तथा परियोजनाहरूको समीक्षा गर्दै, तिनले समुदायमा पार्न सफल प्रभावहरूबारे विस्तृत जानकारी गराइएको थियो। साथै, संस्थाले आगामी दिनमा समुदायमा आधारित योजनाहरूलाई कसरी प्रभावकारी रूपमा कार्यान्वयन गर्न सकिन्छ भन्ने विषयमा सहभागीहरूसँग खुला छलफल पनि गरेको थियो।

नीति निर्माण, सेवा प्रवाहको गुणस्तर, स्थानीय आवश्यकता तथा सुधारका सम्भावनाहरूलाई समेत समेटेर सहभागितामूलक बहस चलाइएको कार्यक्रममा सहभागीहरूले संस्थाको कामको खुलेर प्रशंसा गरेका थिए।

कार्यक्रममा बोल्दै विभिन्न वडाका अध्यक्षहरूले ICDC ले स्थानीय सरकारसँग सहकार्यमा गरेका कामहरू सराहनीय रहेको बताउनु भएको छ। उहाहरुले भविष्यमा समेत यस्ता सहकार्यात्मक प्रयासहरूलाई निरन्तरता दिनुपर्ने धारणा राख्नु भयो।

थाक्रे गाउँपालिकाका प्रमुख प्रशासकीय अधिकृत बलराम लम्सालले पनि कार्यक्रममा शुभकामना व्यक्त गर्नु हुदै साझेदार संस्थाहरू र सरकारबीच हुने समन्वय र सहकार्यले मात्र दीगो विकास सम्भव हुने बताउनु भयो । उहाले स्थानीय सरकारसँगको सहमति र योजनाको समायोजनमा आधारित परियोजनाहरूले मात्र दीर्घकालीन प्रभाव पार्ने स्पष्ट पार्दै साझेदार संस्थाहरूले गरेका काम हरु पनि स्थानिय सरकार तथा नेपालासरकार को सहकार्यमा भएको भनेर बुझ्न नागरिक हरुलाई आग्रह गर्न्नु भयो।

गल्छी गाउँपालिकाका उपाध्यक्ष भाइकाजी तिवारीले पनि यस्ता कार्यक्रम पालिकाका सबै वडामा कार्यान्वयन गर्नुपर्ने सुझाव दिनु भयो।

कार्यक्रमका प्रमुख अतिथि एवं गल्छी गाउपालिकाका अध्यक्ष केदारनाथ खतिवडाले भन्नु भयो , “जुनसुकै संस्था आए पनि नेपाल सरकार तथा स्थानीय सरकारसँग सहमति बिना काम गर्न पाइँदैन। नागरिकहरूले पनि बुझ्नुपर्छ, यी सबै कामहरू सरकारसँगको सहकार्यमा भइरहेका छन्।”

कार्यक्रमले स्थानीय तह र विकास संस्थाबीचको सहकार्यलाई थप सुदृढ बनाएको छ। ICDC ले कार्यक्रममा उपस्थित भई सक्रिय सहभागिता जनाउने सबै सरोकारवालाहरूलाई विशेष धन्यवाद ज्ञापन गर्दै आगामी दिनहरूमा समेत समुदायसँगको प्रत्यक्ष सहकार्यलाई प्राथमिकता दिने प्रतिबद्धता समेत व्यक्त गरेको छ।