धादिङको थाक्रे गाउँपालिका-६, फेदी बजारमा तीज विशेष सांस्कृतिक कार्यक्रम सम्पन्न

थाक्रे ,धादिङ:     धादिङको थाक्रे गाउँपालिका वडा नं ६, फेदी बजारको आठ किलोमा हिन्दु नारीहरुको महान चाड हरितालिका तीजको अवसरमा तीज विशेष सांस्कृतिक कार्यक्रम भव्य रूपमा सम्पन्न भएको छ।

नेपाली कांग्रेस प्रतिनिधि सभा क्षेत्र नं १, धादिङको महिला विभागको आयोजनामा तथा नेपाली कांग्रेस थाक्रे गाउँपालिका कार्यसमितिको सह-आयोजनामा सम्पन्न उक्त कार्यक्रम नेपाली कांग्रेस प्रतिनिधि सभा क्षेत्र नं १ का क्षेत्रीय सदस्य तथा महिला विभागकी संयोजक तारा पुलामीको सभापतित्वमा सम्पन्न भएको हो।

कार्यक्रममा प्रमुख अतिथि नेपाली कांग्रेसका प्रभावशाली युवा नेता, केन्द्रीय सदस्य तथा नेपाल सरकारका माननीय स्वास्थ्य तथा जनसंख्या मन्त्री प्रदिप पौडेल रहनुभएको कार्यक्रममा विशिष्ट अतिथिका रूपमा नेपाली कांग्रेसकी केन्द्रीय सदस्य उर्मिला थपलिया तथा विशेष अतिथि महासमिति सदस्य एवं बागमती प्रदेश सरकारका पूर्व मन्त्री मदु कुमार श्रेष्ठको उपस्थिति रहेको थियो।

सो कार्यक्रममा नेपाली कांग्रेसका विभिन्न पदाधिकारीहरू, नगरपालिका तथा गाउँपालिकाका उपप्रमुखहरू, विभिन्न वडाका वडा अध्यक्षहरू लगायतको उल्लेखनीय उपस्थिति रहेको थियो।

सांस्कृतिक कार्यक्रममा स्थानीय तथा आमन्त्रित कलाकारहरूद्वारा सांस्कृतिक प्रस्तुति रहेको थियो।

यस कार्यक्रमले तीजको सांस्कृतिक महत्वलाई उजागर गर्दै महिला सशक्तिकरण, एकता र सामाजिक सहकार्यको सन्देश प्रवाह गरेको आयोजकहरूले जनाएको छ।